Monday, 19 June 2017

ಅಂಕೀಯ ಅಡ್ಡಿ

ಈಗ ತಾನೆ ಉಡುಪಿ ಕಡೆಯ ಭಟ್ಟರೊಬ್ಬರನ್ನು ಮಾತಾಡಿಸಿ ಬಂದೆ. ಅವರು ಬಹಳ ವರ್ಷಗಳಿಂದ ಬೆಂಗಳೂರಲ್ಲೇ ಇದ್ದಾರಂತೆ. ನನ್ನ ಮನೆಯ ಹತ್ತಿರ ಇದ್ದ ಕೃಷ್ಣಪ್ರಿಯ ಹೋಟೆಲನ್ನ ಇವರು ಟೇಕ್ ಓವರ್ ಮಾಡಿದ್ದಾರೆ. ಹಳೆಯ ಯಜಮಾನ ನನಗೆ ತುಂಬಾ ಪರಿಚಿತನಾಗಿದ್ದ, ಅಂದರೆ ಬರಿ ಬಾಯಿಮಾತಿನ ಪರಿಚಯ. ಅವನು ಮೋದಿ demonitize ಮಾಡಿದಾಗ ಕಾಸಿಲ್ಲದ ನನಗೆ ಕುಡಿಯಲು ಒಂದು ಟೀ ಕೊಡದೆ ಬೇಜಾರು ಮಾಡಿದ್ದವನು. ಎರಡು ವರ್ಷಗಳಿಂದ ಮುಖ ನೋಡುತ್ತಿದ್ದ ಖಾಯಂ ಗಿರಾಕಿ ನನಗೇ ಹೀಗಾದಾಗ... ಮೋದಿ ಒಡೆದದ್ದು ಕಪ್ಪು ಹಣವನ್ನಲ್ಲ, ಭ್ರಷ್ಟರನ್ನಲ್ಲ, ಕಾಂಗ್ರೆಸ್ಸಿಗರನ್ನಲ್ಲ... ಸಾಮಾನ್ಯ ಜನರ ನಡುವಿನ ಸಣ್ಣ ನಂಬಿಕೆಯನ್ನ ಅನಿಸಿ ನನಗೆ ಮೋದಿಯ ಮೇಲೆ ಸಿಟ್ಟು ಬಂದಿತ್ತು. ನನ್ನ ಮುಖಪುಟದಲ್ಲಿ ಕಾರಿಕೊಳ್ಳುತ್ತಿದ್ದ ಅಸಹನೆಗೆ ಅದೇ ಕಾರಣ. ಕ್ರಮೇಣ ಸುಧಾರಿಸಿ ಮತ್ತೆ ಎಲ್ಲ ವಾಪಸ್ಸು ಬಂತು. ಚಿಲ್ಲರೆ ಇಲ್ಲದಿದ್ದರೆ ನಾಳೆ ಕೊಡಿ ಅನ್ನುವುದು ಶುರುವಾಯಿತು. ಈಗ ನೋಡಿದರೆ ವಾರದ ಹಿಂದೆ ಹೋಟೆಲನ್ನ renovate ಮಾಡ್ತಾ ಇದ್ದರು. ಅಕ್ಷರಶಃ ಒಡೆದು ಕಟ್ಟುತ್ತಿದ್ದರು. ನಿನ್ನೆ ಹೋದಾಗ 'ಟೇಕ್ ಓವರ್' ವಿಷಯ ತಿಳಿಯಿತು. ಕೆಲವು ಹಳೆಯ ವಸ್ತುಗಳ ಜೊತೆಗೆ ಹೊಸ ವಸ್ತುಗಳು ಬಂದಿದ್ದವು, ಒಬ್ಬ ಮಾಣಿಯನ್ನು ಬಿಟ್ಟು ಇಡೀ ಟೀಮ್ ಬದಲಾಗಿತ್ತು. ಅವರು ಯಾಕೆ ಮಾರಿದರು ಎನ್ನುವುದು ನನಗಿನ್ನೂ ತಿಳಿದಿಲ್ಲ. demonitize ಆದ ದಿನಗಳಲ್ಲಿ ಹೋಟೆಲ್ ಖಾಲಿ ಒಡೆದಿದ್ದು ನಿಜ. ಕ್ರಮೇಣ ಚೇತರಿಸಿ ಕೊಂಡಂತೆ ಕಂಡರೂ ಶುರುವಿನಲ್ಲಿದ್ದ ಸುಮಾರು ಇಪ್ಪತ್ತರಷ್ಟಿದ್ದ ತಂಡ ಏಳು-ಎಂಟಕ್ಕೆ ಇಳಿದಿತ್ತು. ತಮ್ಮೊಳಗೆ ಜಗಳವಾಡುತ್ತ ಯಜಮಾನನನ್ನ ಬೈಯುತ್ತಾ ಇವರು ಕೆಲಸ ಮಾಡ್ತಾ ಇದ್ರು. ಹೋಟೆಲು ಸ್ವಲ್ಪ ದಿನ ಮುಚ್ಚಿದ್ದಾಗ ದಾರಿಯಲ್ಲಿ ಸಿಕ್ಕ ವೃದ್ಧ ಸರ್ವರ್  ಅಲ್ಲಿಗೆ ಹೋಗುತ್ತಿರುವುದಾಗಿ ಹೇಳಿದರು. ಅವರೇನು ಅಲ್ಲಿ ಇವತ್ತು ಕಾಣಿಸಲಿಲ್ಲ. 

ನಾನು ನಿನ್ನೆ ಹೋದಾಗ ಇವತ್ತಿನ ಓಪನಿಂಗ್ ಸೆರಮೊನಿಗೆ ಅವರು ತಯಾರಿಯಲ್ಲಿದ್ದರು. ನನಗೆ ಟೀ ಕುಡಿಯಬೇಕಿತ್ತು. ನಾಳೆ ಬನ್ನಿ ಅಂತ ಅವರು ಹೇಳಿದರು. ಇವತ್ತು ಬೆಳಿಗ್ಗೆ ಹೋದಾಗ ಹೋಮವೋ ಏನೋ ಬ್ರಾಹ್ಮಣರು ಪೂಜೆ ಮಾಡುತ್ತಿದ್ದರು. ನನಗೆ ಹಾಲು ಕುಡಿಯಬೇಕಿತ್ತು. ನಾನು ಮುಂದಿನ ಹೋಟೆಲಿಗೆ ಹೋಗಿಬಿಟ್ಟೆ. ಸಂಜೆ ಬರುವಾಗ ಏನಾದರು ತಿನ್ನೋಣ ಅಂತ ಹೋದೆ. ಮೆನು ಇಷ್ಟವಾಗಲಿಲ್ಲ. ಪ್ರತಿ ಸಲವೂ ಹೋದಾಗ ಸಿಕ್ಕು ಮಾತಾಡಿಸಿದ್ದ ವ್ಯಕ್ತಿ ಏನಾದರೂ ತಿನ್ನಲು ಹೇಳಿತು. ನಾನು ಹಾಗೇ ಬಂದು ಬಿಟ್ಟೆ. ಅವರ ಮುಖ ನೆನೆದಾಗ ತಿಂದಿದ್ದರಾಯಿತು ಅನ್ನಿಸಿತು. ದೈನ್ಯ ಎಲ್ಲರಿಗೂ ಸ್ವಂತ ತಾನೇ. 

ಋತುಮಾನದಲ್ಲಿ ಯಕ್ಷಗಾನದ ಗೋವಿಂದ ಭಟ್ಟರ ಬಗ್ಗೆ ಓದಿದೆ. ಚೆನ್ನಾಗಿತ್ತು. ಎದ್ದು ಪರ್ಸು ನೋಡಿದರೆ ಖಾಲಿ. ಎಟಿಎಂ ಹತ್ತಿರ ಹೋದವನು ಹೊಸ ಹೋಟೆಲಿಗೆ ಹೋಗಿ ನೋಡೋಣ ಅಂತ ಇಡ್ಲಿ ತಗೆದುಕೊಂಡೆ. ಭಟ್ಟರು ಬದಲಾಗಿದ್ದರಿಂದ ಸಾಂಬಾರು ಸಿಹಿಯಾಗಿತ್ತು. ಹೋಟೆಲಿನ ಸುತ್ತ ಮುತ್ತ ಬಾರುಗಳೇ ಇರುವುದರಿಂದ ಅಲ್ಲಿ ಸಾಂಬಾರು ಯಾವಾಗಲು ಖಾರ ಇದ್ದು ನಾನು ಅಲ್ಲಿ ಬೇರೆ ಏನಾದರೂ ತಿನ್ನುತ್ತಿದ್ದೆ. ಟೀ ತಗೆದುಕೊಂಡು ನನ್ನನ್ನು ಮಾತಾಡಿಸಿದ ಭಟ್ಟರ ಹತ್ತಿರ ಹೋದೆ. 

ನನಗೆ ಕಂಪನಿಯಲ್ಲಿ ಮಾಡಲು ಕೆಲಸವಿಲ್ಲದ್ದರಿಂದ ದಿನವೆಲ್ಲ ಕುಳಿತು ಐಟಿ ದಿಗ್ಗಜರೆಲ್ಲಾ ಚರ್ಚಿಸುತ್ತಿರುವ 'digital disruption' ಬಗ್ಗೆ ಯೋಚಿಸುತ್ತಿದ್ದೆ. ಕನ್ನಡದಲ್ಲಿ ಇದನ್ನ 'ಅಂಕೀಯ ಅಡ್ಡಿ' 'ತಾಂತ್ರಿಕ ತೊಡಕು' ಅಂತೆಲ್ಲ ತರ್ಜುಮೆ ಮಾಡಬಹುದಾದರೂ ಇದರ ಸರಳವಾದ ವಿವರಣೆ ಹೀಗೆ ಹೇಳುತ್ತದೆ. ಹೊಸ ಆವಿಷ್ಕಾರಗಳಿಂದಾಗಿ ಹಳೆಯ ವಸ್ತುಗಳು/ತಂತ್ರಜ್ಞಾನಗಳು/ವಿಧಾನಗಳು/ಸೇವೆಗಳು  ತಮ್ಮ ಮೌಲ್ಯ ಕಳೆದುಕೊಳ್ಳುವುದು ಮತ್ತು ಅದರಿಂದಾಗುವ ಬದಲಾವಣೆಗಳು. 

ಭಟ್ಟರು ಯಕ್ಷಗಾನದ ಶೈಲಿಯಲ್ಲಿ ಆದರೆ ಇಂಗ್ಲೀಷಿನಲ್ಲಿ ನನ್ನ ಮುಂದೆ ಕುಣಿಯತೊಡಗಿದರು....... ಮುಂದುವರಿಯುವುದು.......